काठमाडौं । सभामुख देवराज घिमिरे ले सरकारले आफ्नो आवश्यकतालाई हेरेर मात्रै कानुनमाथि छलफल गर्ने परिस्थितिको अन्त्य गर्न आवश्यक रहेको बताएका छन्। यो टिप्पणी उनले मंगलबार ललितपुरमा भएको सभामुखसहित समिति सभापतिहरुसँगको अन्तरक्रिया कार्यक्रममा गरेका हुन्।
उनले संसदलाई कानुन बनाउने थलो भएपनि हालसम्म संसदले कानुन निर्माणमा अपेक्षित भूमिका खेल्न नसकेको स्वीकार गरे। सभामुख देवराज घिमिरेका अनुसार सरकार आफ्नो आवश्यकता, अध्ययन र बुझाइको आधारमा कानुन प्रस्ताव गर्छ, जसले संसदमा छलफल प्रक्रिया सीमित बनाउँछ। यस अवस्थाको सुधार अपरिहार्य रहेको उनले बताए।
सभामुख देवराज घिमिरेले संसदमा कानुन निर्माण प्रक्रियामा सांसदहरुको सक्रिय सहभागिता सुनिश्चित गर्न सरकारलाई सक्रिय भूमिका खेल्न आग्रह गरे। उनले समितिहरूले विधेयकहरूलाई संसदमा पेश गर्न आवश्यक तयारी गर्नुपर्ने बताए।
उनले संसद अधिवेशन कहिले बोलाउने भन्ने विषय सांसदहरूको सक्रियतामा निर्भर हुने बताउँदै, हालका सांसदहरू संसद अधिवेशनको लागि तयार नरहेको धारणा व्यक्त गरे। उनले समितिहरूलाई विधेयकहरूलाई पूर्ण सदनमा लैजान आवश्यक तयारी गर्न दबाब दिन सुझाव दिए।
