काठमाडौँ, असोज ३ गते । प्रधानमन्त्री वालेन्द्र शाहले संविधानको अक्षर र भावनाप्रति सरकार पूर्णरूपमा प्रतिबद्ध रहेको बताउनुभएको छ। संविधान दिवसका अवसरमा आयोजित मूल समारोहलाई सम्बोधन गर्दै उहाँले यस्तो बताउनुभएको हो।
प्रधानमन्त्री शाहले संविधानको प्रभावकारी कार्यान्वयनका लागि राज्य सञ्चालन गर्ने नेतृत्व र संयन्त्र इमानदार तथा सक्रिय हुनुपर्ने बताउनुभयो। संविधान राम्रो भए पनि त्यसलाई कार्यान्वयन गर्ने हात इमानदार नभए कागजमा मात्र सीमित हुने उहाँको भनाइ थियो।
उहाँले संविधानले विविधताबीचको एकता, विभेद तथा असमानताको अन्त्य, विकास, समृद्धि र सामाजिक न्यायमा आधारित समतामूलक समाज निर्माणको लक्ष्य लिएको बताउनुभयो। प्रतिस्पर्धात्मक बहुदलीय लोकतन्त्र, मानव अधिकार र कानुनी राज्यलाई राष्ट्रिय जीवनको आधारका रूपमा व्याख्या गर्नुभयो।
प्रधानमन्त्री शाहले सरकारको प्राथमिकता सुशासन, विकास, समृद्धि र सामाजिक न्यायमा केन्द्रित रहेको बताउनुभयो। उहाँका अनुसार सरकारले प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनिक राजनीतिक तटस्थता र योग्यताका आधारमा नियुक्तिको नीति अवलम्बन गरेको छ।
“सुशासन नारा होइन, काम हो,” प्रधानमन्त्री शाहले भन्नुभयो। सङ्घ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य पूरा गर्न सरकार प्रतिबद्ध रहेको उहाँले बताउनुभयो।
प्रधानमन्त्रीले अब पुरानै शैलीमा मात्र अघि नबढ्ने बताउनुभयो। कृत्रिम बुद्धिमत्ता, डिजिटल प्रविधि, साइबर सुरक्षा, नवप्रवर्तन र स्टार्टअपलाई प्राथमिकतामा राखेर ज्ञानमा आधारित अर्थतन्त्र निर्माण गर्ने उहाँको भनाइ थियो।
डिजिटल सुशासनका लागि राष्ट्रिय डिजिटल पूर्वाधार निर्माणलाई महत्वपूर्ण आधारका रूपमा अघि बढाइने उहाँले बताउनुभयो। बालुवाले माग गरेको सुशासन प्रविधिको प्रयोगबाट पनि सुनिश्चित गर्ने प्रतिबद्धता उहाँले व्यक्त गर्नुभयो।
यसैगरी, प्रधानमन्त्री शाहले रसुवा–भोटेकोशी बाढीबाट भएको क्षतिप्रति दुःख व्यक्त गर्नुभयो। विपद्को समयमा उद्धार तथा राहत कार्यमा सहयोग गर्ने मित्रराष्ट्र, अन्तर्राष्ट्रिय समुदाय, संघसंस्था, निजी क्षेत्र, राष्ट्रसेवक कर्मचारी र आम नागरिकप्रति उहाँले आभार व्यक्त गर्नुभयो।
नेपाल उच्च विपद् जोखिम भएका मुलुकमध्ये रहेको उल्लेख गर्दै उहाँले विपद् आएपछि मात्र नभई आउनुअघि नै तयारी गर्ने नीति आवश्यक रहेको बताउनुभयो। जोखिम न्यूनीकरण, पूर्वतयारी र प्रतिकार्यमा जोड दिँदै विपद्को पूर्वसूचना प्रणालीलाई प्राथमिकताका साथ कार्यान्वयन गर्ने उहाँले बताउनुभयो।
प्रधानमन्त्री शाहले राजनीतिक व्यवस्था परिवर्तन र सुशासनका लागि भएका आन्दोलनमा ज्यान गुमाउने ज्ञात–अज्ञात सहिदप्रति श्रद्धाञ्जली व्यक्त गर्नुभयो। ऐतिहासिक जेनजी आन्दोलनमा सहादत प्राप्त गरेकाहरूप्रति पनि उहाँले सम्मान व्यक्त गर्नुभयो।
त्यसैगरी, भोटेकोशी बाढीमा ज्यान गुमाएका स्वदेशी तथा विदेशी नागरिकप्रति श्रद्धाञ्जली व्यक्त गर्दै उहाँले शोकसन्तप्त परिवारप्रति समवेदना प्रकट गर्नुभयो। घाइतेहरूको शीघ्र स्वास्थ्यलाभको कामनासमेत गर्नुभयो।
प्रधानमन्त्रीले संविधान जारी भएको दिन हरेक वर्ष आउने भए पनि संविधानको मर्म व्यवहारमा पूरा गर्ने जिम्मेवारी राज्य र नेतृत्वको रहेको बताउनुभयो। हरेक इमानदार निर्णय, पारदर्शी नियुक्ति र नागरिकको घरदैलोमा पुग्ने सेवाबाट संविधानको उद्देश्य पूरा गर्नुपर्ने उहाँको भनाइ थियो।
उहाँले संविधान दिवसको अवसरमा सम्पूर्ण नेपालीलाई शुभकामना दिँदै संविधानले परिकल्पना गरेको सुशासन, विकास, समृद्धि र सामाजिक न्यायको लक्ष्य हासिल गर्न सरकार प्रतिबद्ध रहेको दोहोर्याउनुभयो।
