पूर्वपश्चिम राजमार्ग अन्तर्गत सप्तरी जिल्लामा भएको सडक दुर्घटनामा दुईजनाको मृत्यु भएको छ। कञ्चनरूप नगरपालिकामा डिजेल बोकेको ट्यांकरले ठक्कर दिँदा मोटरसाइकलमा सवार महेश कुमार मेहता र जयप्रकाश मेहताको ज्यान गएको हो।
सुनसरीको हरिनगरा गाउँपालिका-३ निवासी महेश कुमार मेहताको घटनास्थलमै मृत्यु भएको छ भने जयप्रकाश मेहताको उपचारको क्रममा मृत्यु भएको सप्तरी प्रहरीले जनाएको छ। दुर्घटना आज दिउँसो कञ्चनरूपबाट भारदहतर्फ जाँदै गरेको डिजेल लोड गरिएको को१ख ७४१४ नम्बरको ट्यांकर र विपरीत दिशाबाट आउँदै गरेको मोटरसाइकल ठोक्किँदा भएको हो।
दुर्घटनामा ट्यांकर चालक सिरहा जिल्ला कर्जना नगरपालिका-३ का ३२ वर्षीय मिथलेश यादव घाइते भएका छन्। उनको उपचार धर्मेश्व अस्पताल ठेलियामा भइरहेको छ।
डिजेल बोकेको ट्यांकरले ठक्कर दिँदा दुर्घटनापछि प्रहरीद्वारा मोटरसाइकल र ट्यांकरलाई नियन्त्रणमा लिइएको छ भने घटनाको थप अनुसन्धान भइरहेको छ। दुर्घटनाप्रति स्थानीयवासीले गहिरो दुःख व्यक्त गरेका छन्।
