काभ्रे — काभ्रेपलाञ्चोक जिल्लाको बीपी राजमार्ग अन्तर्गत दुई स्थानमा पहिरो र खहरे खोलाको लेदो खस्दा राजमार्ग पूर्ण रुपमा अवरुद्ध भएको जिल्ला प्रहरी कार्यालय काभ्रेले जनाएको छ ।
कार्यालयका सूचना अधिकारी प्रहरी नायब उपरीक्षक रविन विष्टका अनुसार, जिल्लास्थित रोशी गाउँपालिका–९ पिन्थलीमा सडक माथिबाट ढुङ्गा र माटोसहितको लेदो खसेको छ भने रोशी गाउँपालिका–८ गिम्दीबेसीमा पहिरो झरिरहेको छ ।
दुवै स्थानमा सडक अवरुद्ध भएपछि अहिले बीपी राजमार्गमा दुईतर्फी सवारी आवागमन पूर्ण रूपमा बन्द भएको उनले जानकारी दिए ।सडकको अवस्थाबारे जानकारी लिएर मात्रै यात्रा गर्न सर्वसाधारणलाई प्रहरीले अनुरोध गरेको छ।
