काठमाडौँ । बेत्रावतीमा भोटेकोशीमा बाढी आएको ११ दिनपछि चण्डिका श्रेष्ठको जीवितै उद्धार गरिएको छ। सशस्त्र प्रहरी र नेपाल प्रहरीको संयुक्त टोलीले शनिबार उनको उद्धार गरेको हो।
अहिलेसम्म बाढीमा फसेका चार जनाको जीवितै उद्धार गरिएको छ। उद्धार टोलीका अनुसार आनन्द श्रेष्ठको घरबाट चण्डिका श्रेष्ठलाई फेला पारिएको हो।
बाढी आएको तेस्रो दिन उक्त चारतले घर बगाएर अर्कोतर्फ पुगेको थियो। घरको तीन तला हिलोले पुरिएको थियो। माथिल्लो तलाको आधा भाग मात्र बाहिर देखिएको थियो।
खोजीका क्रममा उद्धार टोलीले महिलाको जस्तो आवाज सुनेपछि घरमा प्रवेश गरेको थियो। सशस्त्र प्रहरीका इन्सपेक्टर सुमन विकको नेतृत्वमा उद्धार टोली खटिएको थियो।
टोली-मा विपद् व्यवस्थापन तालिम प्राप्त १० जना सशस्त्र प्रहरी कर्मचारी थिए। साथै, नेपाल प्रहरीको टोली पनि उद्धारमा परिचालित थियो।
दिउँसो करिब १ बजे आवाज सुनेपछि उद्धार टोलीले खोजी थालेको थियो। झ्याल फोडेर घरभित्र प्रवेश गर्दा महिला हिलोमा आधा दबिएको अवस्थामा भेटिएकी थिइन्।
उद्धार टोलीले हिलो हटाउँदै झ्याल काटेर महिलालाई बाहिर निकालेको थियो। उद्धार कार्य पूरा गर्न करिब ४० देखि ४५ मिनेट लागेको इन्सपेक्टर विकले बताएका छन्।
महिलाको शरीरको माथिल्लो भाग सुरक्षित रहेकाले उनी बोल्न सक्ने अवस्थामा थिइन्। तर, अवस्था बिग्रन सक्ने भन्दै उनलाई धेरै बोल्न नदिइएको उद्धार टोलीले जनाएको छ।
त्यसपछि उनलाई उपचारका लागि काठमाडौँ पठाइएको छ। यसअघि सुरक्षाकर्मीले बाढी प्रभावित क्षेत्रमा निरन्तर खोजी गरिरहेका थिए।
उद्धार टोली विगत १० दिनदेखि बेत्रावती आसपासमै परिचालित थियो। टोलीले एक घरबाट २२ जनाको शवसमेत निकालेको जनाएको छ।
यसैबीच, प्रभावित क्षेत्रमा खोजी तथा उद्धार कार्य निरन्तर जारी रहेको छ। उद्धार टोलीले बिहान, दिउँसो र बेलुका नियमित रूपमा खोजी गरिरहेको जनाएको छ।
