१३ कात्तिक, काठमाडौं । नेकपा एकीकृत समाजवादीभित्र माओवादी केन्द्रसँग हुने भनिएको पार्टी एकता प्रक्रियाविरुद्ध असन्तुष्टि तीव्र बनेको छ। पार्टीका वरिष्ठ नेता तथा पूर्वप्रधानमन्त्री झलनाथ खनाल र महासचिव घनश्याम भूसाललगायत नेताहरूले एकता प्रक्रियालाई “विसर्जन”को बाटो भन्दै तत्काल रोक्न माग गरेका छन्। उनीहरूले पार्टी पुनर्गठन र नेतृत्व परिवर्तन बिना माओवादीसँग मिलन सम्भव नरहेको स्पष्ट सन्देश दिएका छन्।
धुम्बाराहीमा जारी केन्द्रीय कमिटी बैठकमा नेता खनालले दिल्लीबाट फर्किएर माओवादीसँग एकता रोक्नुपर्ने भन्दै भावनात्मक सम्बोधन गरेका थिए। “माओवादीमा मिसिनुअघि अन्तिम बैठक होला भन्ने लागेर फर्किएको हुँ,” उनले भने, “हिजो कांग्रेसतिर गएर गल्ती भयो, अहिले माओवादीतिर मिसिनु विसर्जन हो।” उनले अध्यक्ष माधवकुमार नेपाललाई पदत्याग गरेर पार्टीलाई वैचारिक रूपमा पुनःस्थापित गर्न आग्रह गरे।
त्यस्तै, महासचिव घनश्याम भूसालले पनि बैठकमा लामो राजनीतिक विश्लेषण प्रस्तुत गर्दै तत्कालीन एमाले–माओवादी एकताको असफलता दोहोरिन नहुने तर्क गरे। उनले भने, “आजको संकट समाधान नेतृत्वको विदाइबाट सुरु हुन्छ। प्रचण्ड र माधव कमरेडले भूमिका बदल्नुपर्छ।” भूसालले आगामी चुनाव अघि नेतृत्व परिवर्तनको सुनिश्चितता भए मात्र एकताको सम्भावना रहने बताए।
पार्टीका वरिष्ठ नेता प्रमेश हमाल र राजेन्द्र पाण्डेले भने माओवादीसँगको एकता ‘सम्मानजनक पुनर्गठन’को अवसरका रूपमा लिनुपर्ने पक्षमा बोले। उनीहरूले समाजवादी कार्यदिशा, संगठनात्मक समायोजन र नेतृत्व पुनर्निर्माणको प्रक्रिया ६ महिनाभित्र सम्पन्न गर्ने सहमति भएको दाबी गरे। तर संस्थापन इतर पक्षले यी प्रस्तावहरू अस्वीकार गर्दै माओवादीमा मिसिनु आत्मसमर्पण भएको बताए।
बैठकमा नेताहरूबीच तीव्र बहस र मतभेद देखिएको छ। एक पक्षले तत्काल एकता प्रक्रियाबाट पछि हट्नुपर्ने अडान लिएको छ भने अर्को पक्षले वाम शक्तिहरूबीच सहकार्यलाई समयको माग बताएको छ। बहसले पार्टीमा नेतृत्व संकट, वैचारिक अस्पष्टता र भविष्यको दिशा तय गर्न चुनौतीपूर्ण अवस्था सिर्जना गरेको छ। अन्ततः, केन्द्रीय कमिटीले एकता गर्ने वा नगर्ने अन्तिम निर्णय आगामी चरणमा गर्ने तयारी गरेको बताइएको छ।
