आवाज बिहिनहरुको आवाज
भ्रष्टाचारको अन्त्य र सुशासनको माग गर्दै उठेको जेनजी आन्दोलनले तत्कालीन सरकार ढाले पनि नेताहरूको शैली र सोचमा परिवर्तन आएको छैन। आन्दोलनपछि पनि राजनीतिक दलहरू आफ्नै स्वार्थ र शक्ति केन्द्रित राजनीतिमा तल्लीन देखिएका छन्।
नेकपा एकीकृत समाजवादीभित्र माओवादीसँग हुने भनिएको एकता प्रक्रियाविरुद्ध नेताहरूले तीव्र असहमति जनाएका छन्। झलनाथ खनाल र घनश्याम भूसाललगायत नेताहरूले पार्टीलाई ‘विसर्जन’ हुन नदिन एकता तत्काल रोक्न आग्रह गर्दै अध्यक्ष माधवकुमार नेपालको राजीनामा माग गरेका छन्।
नेपाली कांग्रेसको विद्यार्थी संगठन नेपाल विद्यार्थी संघले युवामैत्री कांग्रेस निर्माणको माग गर्दै सानेपास्थित पार्टी केन्द्रीय कार्यालयमा धर्ना दिएको छ। उनीहरूले पार्टीमा ४० प्रतिशत युवा सहभागिता सुनिश्चित गर्नुपर्ने र विधान संशोधन नगरी महाधिवेशन मान्य नहुने चेतावनी दिएका छन्।
नेकपा एमालेले सरकारले इतिहासमा स्थापित राजनीतिक दलहरूलाई अस्वीकार गर्ने बाटो नअपनाउन चेतावनी दिएको छ। उपमहासचिव प्रदीप ज्ञवालीले वर्तमान सरकारलाई मित्रवत् सम्बन्धमा अघि बढ्न सुझाव दिँदै निषेधको राजनीतिले देशलाई लाभ नपुर्याउने बताएका छन्।
नेपाली कांग्रेसका प्रवक्ता डा. प्रकाशशरण महतले पार्टी सभापति शेरबहादुर देउवामाथि भएको आक्रमणको घाउ निको नभइसकेको अवस्थामा नेतृत्व परिवर्तनको बहस गर्नु गलत भएको टिप्पणी गरेका छन्। उनले घाउमा नुन छर्ने प्रवृत्तिले पार्टीलाई कमजोर बनाउने भन्दै अहिले एकतामा जोड दिनुपर्ने बताए।
सभामुख देवराज घिमिरेले प्रतिनिधिसभा संचालनमा देखाएको शैलीलाई लिएर फेरि विभेदकारी आरोप सतहमा आएको छ। प्रतिपक्षी सांसदहरूको माइक काट्नेदेखि सत्तापक्षप्रति उदारता देखाउने उनको भूमिकाले निष्पक्षताको सवाल उठाइरहेको छ।
उच्च अदालत पाटनको आदेशपछि दुर्गा प्रसाईं डिल्लीबजार कारागारबाट धरौटीमा रिहा भएका छन्। बैंकिङ कसुर र हिंसात्मक प्रदर्शनसँग जोडिएको मुद्दामा उनी धरौटीमा छुटेका हुन्।
माओवादी केन्द्रका सचिव राम कार्कीले अध्यक्ष प्रचण्डको सम्मानित भूमिकालाई कायम राख्दै पार्टी सञ्चालनको कार्यकारी नेतृत्वलाई ‘रोटेशन’ प्रणालीबाट अघि बढाउने प्रस्ताव गरेका छन्। उनले स्थायी समिति बैठकमा लेनिन र माओको उदाहरण दिँदै समयमै नेतृत्व हस्तान्तरणका लागि नयाँ विकल्पको आवश्यकता औंल्याएका हुन्।
कांग्रेस सांसद डा. सुनिल शर्माले डा. शेखर कोईरालाको पक्षमा हाल पार्टीमा ६० प्रतिशत सांसद रहेको दाबी गरेका छन्। उनले सरकारमा रहेका शेखर पक्षीय मन्त्रीहरूलाई फिर्ता बोलाउने विषयमा छलफल भएको र अर्को बैठकबाट निर्णय हुने बताए।
पूर्वउपप्रधानमन्त्री वामदेव गौतम नेकपा एकीकृत समाजवादीमा फर्किने भएका छन्। नेकपा एकता राष्ट्रिय अभियानलाई एकीकृत समाजवादीमा मिलाउने सहमति भइसकेको छ। अब साउन २ गते एकता घोषणा गरिनेछ।
