रौतहट । सरस्वती माताको मूर्ति वाग्मती नदीमा सेलाउने क्रममा बेपत्ता भएका युवक सुरज यादवको शव फेला परेको छ। मंगलबार साँझ मूर्ति विसर्जन गर्ने क्रममा राजदेवी नगरपालिका–७, मुडवलवाका २२ वर्षीय सुरज यादव बेपत्ता भएका थिए। सुरक्षाकर्मी र स्थानीयबासिन्दाको खोजी प्रयासपछि बुधबार बिहान उनको शव फेला परेको जिल्ला प्रहरी कार्यालय, रौतहटका प्रवक्ता डिएसपी दीपककुमार रायले जानकारी दिए।
राजदेवी नगरपालिका–६ स्थित वाग्मती नदीमा डुबेका यादवको शव माछा मार्ने जाल प्रयोग गरी बाहिर निकालिएको थियो। प्रहरीले मंगलबार राति नै खोजीकार्य जारी राखेपनि सफलता नपाएपछि बुधबार बिहान पुनः खोजी थालिएको थियो। अन्ततः सोही स्थानमा उनको शव भेटिएको प्रहरीले जनाएको छ।
शवलाई पोष्टमार्टमपछि परिवारजनलाई जिम्मा लगाइएको छ। मूर्ति विसर्जनको क्रममा यसरी दुःखद घटना घट्नुले नदीमा सुरक्षा सावधानीको खाँचो औंल्याएको छ। यस घटनापछि स्थानीयहरूले भविष्यमै यस्ता दुर्घटना हुन नदिन आवश्यक सुरक्षा उपाय अपनाउनुपर्ने माग गरेका छन्।
