आवाज बिहिनहरुको आवाज
समाजवादी मोर्चाले आगामी चैत १९ गते व्यवस्थाको रक्षाका लागि जनप्रदर्शन गर्ने तयारी गरिरहेको छ। मोर्चामा आवद्ध दलहरूले आन्तरिक तयारी तीव्र बनाएका छन्। एकीकृत समाजवादीको स्थायी कमिटी बैठकले हजारौँ समर्थक सडकमा उतार्ने योजना बनाएको छ। कम्तीमा ६० हजारदेखि एक लाखसम्म मानिस सहभागी गराउने लक्ष्य राखिएको छ। गणतन्त्रको विकल्प राजतन्त्र हुन नसक्ने समेत नेताहरूले बताएका छन्।
नेपालमा पश्चिमी न्यूनचापीय प्रणालीको प्रभाव देखिँदै, विभिन्न प्रदेशहरूमा आंशिकदेखि सामान्य बदली भएको छ। सुदूरपश्चिम, कर्णाली, र कोशी प्रदेशका उच्च पहाडी तथा हिमाली क्षेत्रमा हल्का हिमपातको सम्भावना रहेको छ भने केही स्थानहरूमा चट्याङ्गसहित हल्का वर्षा र हावाहुरीको सम्भावना रहेको छ। मौसम परिवर्तनले दैनिक जनजीवन, यातायात तथा स्वास्थ्य क्षेत्रमा असर पार्न सक्ने भएकाले सतर्कता अपनाउन मौसम पूर्वानुमान महाशाखाले आग्रह गरेको छ।
सर्वोच्च अदालतले समलिङ्गी विवाह लाई कानुनी मान्यता दिने कि नदिने भन्ने विषयमा चैत ५ गते मङ्गलवार फैसला सुनाउने भएको छ।आइतबार न्यायाधीशद्वय सपना प्रधान मल्ल र सुनिलकुमार पोखरेलको संयुक्त इजलास मा सुनुवाइपछि फैसला मितिका लागि निसु तोकिएको हो।
नेपाल आयल निगमले पेट्रोलमा ५ रुपियाँ र डिजेल-मट्टितेलमा ४ रुपियाँ घटाएर नयाँ मूल्य लागू गरेको छ। इण्डियन आयल कर्पोरेसनबाट प्राप्त नयाँ मूल्यअनुसार स्थानीय बजारमा समायोजन गरिएको हो।
कैलालीको मोहना नदीमा नुहाउने क्रममा दुई किशोरको ज्यान गएको छ भने दुई जनाको सकुशल उद्धार गरिएको छ। मृतकका शव ३० मिटर पर फेला परेको प्रहरीले जनाएको छ।
गृहमन्त्री रमेश लेखकले भ्रष्टाचार नियन्त्रण गर्दै सुशासन कायम गर्न सरकार गम्भीर रहेको बताउनुभएको छ। बेलहियास्थित अध्यागमन कार्यालयको नवनिर्मित भवन उद्घाटन गर्दै उहाँले व्यवसायमैत्री वातावरण तयार पार्दै आर्थिक उन्नति सरकारको प्राथमिकता भएको उल्लेख गर्नुभयो।
संघीय संसद् अन्तर्गत आज दुई संसदीय समितिको बैठक बस्ने भएको छ।बिहान ११ बजे अर्थ समितिको बैठक बस्नेछ, जसमा भन्सार सम्बन्धी कानुनलाई संशोधन र एकीकरण गर्न बनेको विधेयकमाथि दफावार छलफल हुनेछ। बैठक अर्थ समितिको बैठक कक्षमा हुनेछ।
सामाजिक विकास कार्यालय पर्वतले आर्थिक रूपमा पछाडि परेका महिलाहरूलाई सरकारी सेवामा प्रवेश गराउने उद्देश्यले निःशुल्क लोकसेवा तयारी कक्षा सुरु गरेको छ। २० दिने कक्षामा नायब सुब्बा र खरिदार पदको तयारी गराइँदै छ। सहभागी महिलाहरूले यसलाई सुनौलो अवसरका रूपमा लिएका छन्।
राष्ट्रपति रामचन्द्र पौडेलले राष्ट्र निर्माणको महाअभियानमा जुट्न सबैलाई अपिल गर्नुभएको छ। उहाँले युवा पलायन रोक्न, कृषि, पर्यटन, जलस्रोत, र पूर्वाधार विकासमा ध्यान दिनुपर्ने बताउनुभयो। पोखरालाई विश्वस्तरीय पर्यटन गन्तव्य बनाउन नीति निर्माताहरू, सरकारका तीन तह, र निजी क्षेत्रलाई समर्पित भएर लाग्न आग्रह गर्नुभयो।
नेपालमा पश्चिमी न्यून चापीय प्रणालीको प्रभावका कारण सुदूरपश्चिम, कर्णाली, गण्डकी तथा बागमती प्रदेशका केही स्थानहरूमा हल्का वर्षा तथा उच्च पहाडी क्षेत्रमा हिमपातको सम्भावना रहेको छ। मौसम महाशाखाले यातायात तथा जनजीवनमा असर पर्ने भएकाले सतर्कता अपनाउन आग्रह गरेको छ।
