२४ असोज, काठमाडौं । नेकपा एमालेले वर्तमान सरकारलाई इतिहासमा स्थापित राजनीतिक दलहरूलाई अस्वीकार नगर्न आग्रह गरेको छ। शुक्रबार बसेको सचिवालय बैठकपछि सञ्चारकर्मीहरूसँग कुरा गर्दै एमाले उपमहासचिव प्रदीप ज्ञवालीले सरकारले निषेधको राजनीति नगरी सहकार्यको बाटो अपनाउनुपर्ने बताए।
ज्ञवालीले भने, “इतिहासमा स्थापित दलहरूलाई इन्कार गर्ने बाटोमा नजानुहोस्, त्यो पार लाग्ने बाटो पनि होइन। त्यसले हामीलाई कहीँ पुर्याउँदैन,” भन्दै सरकारलाई चेतावनी दिएका छन्। उनले राजनीतिक दलहरूबीचको संवाद र सहकार्य नै स्थायित्वको मूल आधार हुने जिकिर गरे।
एमालेले वर्तमान सरकारले विपक्षी दलहरूलाई दूर राख्ने प्रयास गरिरहेको आरोप लगाएको छ। ज्ञवालीका अनुसार, सत्तापक्षले विपक्षीका सुझाव र आलोचनालाई बेवास्ता गर्दै निषेधको अभ्यास सुरू गरेको छ, जुन देशको लोकतान्त्रिक परम्पराका लागि खतरनाक संकेत हो।
उनले पार्टीको महाधिवेशन तयारीसम्बन्धी छलफल सचिवालय बैठकमा जारी रहेको पनि जानकारी दिए। भोलिसम्म महाधिवेशनको एजेन्डा तय गरिने र पार्टीको आगामी दिशा तय गरिने उनले बताए। बैठकमा हालको राजनीतिक अवस्थाबारे समेत विस्तृत मूल्यांकन गरिएको थियो।
ज्ञवालीले अन्त्यमा भने, “सरकारले मित्रवत् रूपमा दलहरूलाई साथ लिएर अघि बढ्नुपर्छ। निषेध र द्वन्द्वको बाटोले देशलाई फाइदा पुर्याउँदैन,” भन्दै एमाले संवाद र सहकार्यका माध्यमबाट स्थायित्व खोज्ने पक्षमा रहेको बताए। उनका अनुसार, राजनीतिक सहमति नै आगामी राष्ट्रिय निकासको मुख्य कुञ्जी हो।
