गौर । रौतहटको गौर नागरपालिका–९ स्थित गौर–सिरसिया सडक खण्डमा सुटकेशभित्र मृत भेटिएकी रुवी शाह सुडीको हत्यामा संलग्न आशङ्कामा प्रहरीले एक जनालाई पक्राउ गरेको छ ।
पक्राउ पर्ने रिक्सा चालक हुन् । पक्राउ पर्नेको नाम प्रहरीले सार्वजनिक गरेको छैन । भदौ ७ मा राति गौर नगरपालिका–२ मा बस्दै आएकी २६ वर्षीया रुवी मृत भेटिएकी थिइन् ।
प्रहरी हत्याराको नजिक पुगेको जिल्ला प्रहरी कार्यालय रौतहटका डीएसपी राजु कार्कीले बताए । उनले भने, ‘धेरैसँग सोधपुछ गर्ने काम भइरहेको छ, हामी हत्याराको नजिक पुगेका छौँ ।’
माधवनारायण नगरपालिका–६ माइती भएकी रुवीले भारतमा विवाह गरेकी थिइन् । उनको शव व्यवस्थापन गर्न रिक्सा प्रयोग भएको प्रहरीको अनुसन्धान निष्कर्ष छ ।
रिक्सा चालकको बयानको आधारमा हत्यारासम्म पुग्ने आकलन गरिएको अनुसन्धानमा संलग्न एक जना अधिकृतले बताए ।
