नेपालमा पहिलो पटक आयोजना गरिएको सौन्दर्य प्रतियोगिता ‘मिस एण्ड मिसेस रोयल ग्लोबल क्विङ्ग नेपाल’ को स्यास (Sash) कार्यक्रम काठमाडौंको प्रमुख पर्यटनस्थल ठमेलस्थित ओएसिस क्लबमा भव्य रूपमा सम्पन्न भएको छ।
शाह स्टुडियो एण्ड कम्पनीद्वारा आयोजित यो प्रतियोगिता मुम्बईबाट फ्रेन्चाइज गरिएको हो, जसले नेपालका प्रतिभावान महिला तथा विवाहित महिलाहरूलाई राष्ट्रिय तथा अन्तर्राष्ट्रिय स्तरमा पहिचान दिलाउने लक्ष्य राखेको छ। प्रतियोगिताको स्यास कार्यक्रम एक रंगीन र आकर्षक वातावरणमा सम्पन्न भएको थियो, जसमा विशेष अतिथिका रूपमा अन्तर्राष्ट्रिय मोडल तथा चिकित्सक डा. नवीन शाह र चर्चित फेसन डिजाइनर सुक्निता चौलागाईंको उपस्थितिले कार्यक्रमलाई अझ गरिमामय बनाएको थियो।
उक्त अवसरमा सहभागी प्रतियोगीहरूलाई औपचारिक रूपमा स्यास (पट्टिका) लगाइदिइएको थियो, जसले उनीहरूलाई आधिकारिक रूपमा प्रतियोगिताको प्रतिस्पर्धीको रूपमा मान्यता दिएको हो। कार्यक्रममा अतिथिहरूले सौन्दर्य प्रतियोगिताले आत्मविश्वास, व्यक्तित्व विकास र नेतृत्व क्षमताको विकासमा महत्वपूर्ण भूमिका खेल्ने बताएका थिए।
आयोजक संस्थाका अनुसार, ‘मिस एण्ड मिसेस रोयल ग्लोबल क्विङ्ग नेपाल’ प्रतियोगिताले नेपाली महिलाहरूको प्रतिभा, क्षमता र सौन्दर्यलाई अन्तर्राष्ट्रिय मञ्चमा पुर्याउने अवसर दिनेछ। निकट भविष्यमै यस प्रतियोगिताको ग्राण्ड फिनाले आयोजना गरिने जनाइएको छ। सहभागीहरूलाई विभिन्न प्रशिक्षण, सामाजिक कार्य, फोटोशूट, र व्यक्तित्व विकास सम्बन्धी गतिविधिमा सहभागी गराइने कार्यक्रमको योजना रहेको आयोजकले जानकारी दिएको छ।
