डोटीको घरेलु तथा साना उद्योग कार्यालयमा हालसम्म ६५५१ उद्योग दर्ता भएका छन्। ती मध्ये ३९८२ उद्योग र २५६९ वाणिज्य फर्म छन्। तर, दर्ता भएका व्यावसायिक फर्महरूको तुलनामा नवीकरण गर्ने दर निकै कम रहेको छ। आर्थिक वर्ष २०७६/७७ देखि हालसम्म २४२४ फर्म मात्रै नवीकरण गरिएको छ। यसले व्यवसायीले दर्ता गरे पनि नवीकरणमा ध्यान नदिएको स्पष्ट देखिन्छ।
स्थानीय तह र उद्योग वाणिज्य संघ तथा चेम्बर अफ कमर्समा पनि व्यावसायिक फर्म दर्ता र नवीकरणको व्यवस्था रहेको भए तापनि, व्यवसायीहरूले प्यान र भ्याट नम्बर प्राप्त गरेर व्यवसाय सञ्चालन गर्नुपर्ने कानूनी प्रावधान पालना नगरेका छन्। करदाता सेवा कार्यालय डोटीका अनुसार ७५४७ फर्म प्यान तथा भ्याटमा दर्ता छन्, तर तीन हजार २४ फर्मले अझै नवीकरण र कर चुक्ता गरेका छैनन्।
घरेलु तथा साना उद्योग डोटीका प्रमुख मोहन कठायतका अनुसार पछिल्लो समय उद्योगतर्फ बढी फर्म दर्ता हुने गरेको देखिएको छ। २०७४ अघि वाणिज्यतर्फ किराना पसल, होटेल जस्ता व्यवसाय दर्ता हुने गरे पनि, २०७४ पछि उद्योगतर्फ बढी फर्म दर्ता भएका छन्। तर, अनुदान र ऋणको आशामा दर्ता गरिएका धेरै फर्महरूले नवीकरण नगरेको पाइएको छ।
व्यवसायिक फर्मको नवीकरण नगर्ने समस्या आर्थिक अनुदानको लालचले बढेको छ। ऋण पाउन र सरकारी अनुदानको फाइदा उठाउन फर्म दर्ता गरिए पनि, नवीकरण नगर्दा भविष्यमा ठूलो आर्थिक जोखिम पर्ने संभावना रहेको डोटी उद्योग वाणिज्य संघका अध्यक्ष विक्रम साउदले बताए। करदाता सेवा कार्यालयले हाल आय विवरण र कर दाखिला गर्न बाँकी फर्महरूलाई जरिबाना र ब्याज छुटको व्यवस्था गरेको छ।Source link
