आवाज बिहिनहरुको आवाज
नेपाली कांग्रेसका नेता डा. केदारनरसिंह केसीले सरकारी जग्गा कब्जा गरेको आरोप प्रमाणित गर्न सांसदहरूलाई चुनौती दिएका छन्। पत्रकार सम्मेलनमा उनले आधार र प्रमाणबिना भ्रमपूर्ण प्रचार गरिएको भन्दै कानुनी कारबाहीको चेतावनी दिए।
सभामुख देवराज घिमिरेले नेपालको दिगो विकासका लागि चीनसँगको सहकार्यलाई अझ प्रभावकारी बनाउँदै नयाँ परियोजनालाई प्राथमिकता दिनुपर्ने बताएका छन्। नेपाल-चीन सम्बन्ध केवल व्यवसायिक वा आर्थिक सहयोगमा सीमित नभई सांस्कृतिक, शैक्षिक तथा प्राविधिक हस्तान्तरणमा पनि विस्तार भइरहेको उनले उल्लेख गरे।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आन्दोलनरत शिक्षकका मागलाई सरकारले शीघ्र सम्बोधन गर्नुपर्नेमा जोड दिएका छन्। विद्यालय शिक्षा विधेयक तत्काल पारित गर्नुपर्ने आवश्यकता औंल्याउँदै, उनले शिक्षा नै राष्ट्रको समृद्धिको मुख्य आधार भएको बताएका छन्।
काभ्रेपलाञ्चोकको पनौती नगरपालिकामा मापदण्डविपरीत सञ्चालन भएका तीन खानी तथा क्रसर उद्योग बन्द गरिएका छन्। बिनाअनुमति सञ्चालन भइरहेका यस्ता उद्योगहरूले बाढीपहिरो, भू-स्खलन, र पर्यावरणीय जोखिम निम्त्याएको भन्दै अनुगमन समितिले कारबाही अघि बढाएको हो।
काठमाडौंको बसन्तपुरमा परम्परागत चीर ठड्याइएसँगै होली पर्व सुरु भएको छ। फागुन २९ गते पहाडमा र चैत १ गते तराईमा मनाइने होलीले रंग, प्रेम र सद्भावको सन्देश बोकेको छ।
संयुक्त अरब इमिरेट्स (युएई) ले ५३ जना राजनीतिक असन्तुष्टहरूको अपिल अस्वीकार गरेको छ, जसलाई मानव अधिकार संगठनहरूले ‘अन्यायपूर्ण’ ठहर गरेका छन्। युएईमा आजीवन कारावास भोगिरहेका कैदीहरूको कानुनी सहायता सीमित गरिएको भन्दै एचआरडब्लुले कडा आलोचना गरेको छ।
प्रधानमन्त्री केपी शर्मा ओलीले मानव अधिकार संरक्षण, कानुनी शासन, र समृद्ध समाज निर्माणका लागि सरकार पूर्ण रूपमा प्रतिबद्ध रहेको बताउनुभएको छ। मानव अधिकार उल्लङ्घन रोक्न र शान्तिपूर्ण, समानतामूलक समाज निर्माण गर्न सरकारले ठोस कदम चाल्ने उहाँको भनाइ छ।
गृहमन्त्री रमेश लेखकले भ्रष्टाचार नियन्त्रण गर्दै सुशासन कायम गर्न सरकार गम्भीर रहेको बताउनुभएको छ। बेलहियास्थित अध्यागमन कार्यालयको नवनिर्मित भवन उद्घाटन गर्दै उहाँले व्यवसायमैत्री वातावरण तयार पार्दै आर्थिक उन्नति सरकारको प्राथमिकता भएको उल्लेख गर्नुभयो।
जनकपुरधामस्थित मधेस प्रदेश भवनभित्र मधेस शहिद प्रतिष्ठानका सदस्य रामनरेश राय यादव मृत फेला परेका छन्। उनको मृत्युको कारण खुल्न नसके पनि अनुसन्धान भइरहेको प्रहरीले जनाएको छ।
संघीय संसद् अन्तर्गत आज दुई संसदीय समितिको बैठक बस्ने भएको छ।बिहान ११ बजे अर्थ समितिको बैठक बस्नेछ, जसमा भन्सार सम्बन्धी कानुनलाई संशोधन र एकीकरण गर्न बनेको विधेयकमाथि दफावार छलफल हुनेछ। बैठक अर्थ समितिको बैठक कक्षमा हुनेछ।
