सर्लाही। सर्लाहीको लालबन्दी नगरपालिका-१५ स्थित सर्लाही र सिन्धुलीको सिमाना चुरे पहाडमा यात्रुबहाक बस दुर्घटना भएको छ। आज पौने चार बजे लालबन्दी बजारबाट सिन्धुलीको मरिण हुँदै छापतर्फ गइरहेको बा २ ख ६४३३ नम्बरको काल्तान ट्राभल्स बस साइड लगाउने क्रममा चिप्लिएर दुर्घटनामा परेको हो।
इलाका प्रहरी कार्यालय लालबन्दीका प्रहरी निरीक्षक सुजन पाठकका अनुसार विपरीत दिशाबाट आइरहेको जन्ती बसलाई साइड दिने क्रममा बस चुरे पहाडको झाडीमा पल्टिएको थियो। स्थानीय प्रत्यक्षदर्शीहरूले बस चिप्लिएर खोल्सामा पुगेको पुष्टि गरेका छन्।
सुदूर र जोखिमपूर्ण स्थानमा दुर्घटना भए पनि कुनै मानवीय क्षति नभएकोमा राहत महसुस गरिएको छ। अस्थायी प्रहरी पोष्ट परवानीपुरबाट आएको प्रहरी टोलीले तुरुन्त उद्धार कार्यमा जुटेर यात्रुहरूलाई सुरक्षित रूपमा बाहिर निकालेको जानकारी दिएको छ।
दुर्घटनास्थलमा उद्धार कार्य पूरा भए पनि विस्तृत विवरण आउन बाँकी रहेको प्रहरीले जनाएको छ। दुर्घटनामा मानवीय क्षति नभएको खबरले स्थानीयवासीलाई ठूलो राहत प्रदान गरेको छ।
यस्ता जोखिमपूर्ण सडकमा सुरक्षित यात्रा सुनिश्चित गर्न आवश्यक नियमहरूको पालना र सावधानीपूर्ण ड्राइभिङ जरुरी रहेको भन्दै प्रहरी र स्थानीय प्रशासनले सबै यात्रुहरूलाई सचेत रहन आह्वान गरेका छन्।
