Darpan Aawaj

सिरहाको नवराजपुर गाउँपालिकाका अध्यक्ष विश्वमोहनप्रसाद यादवसहित १२ जनाविरुद्ध विशेष अदालतमा भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले सोमबार दायर गरेको यो मुद्दामा गाउँपालिकाका उच्च अधिकारी र उपभोक्ता समितिका सदस्यहरूलाई सरकारी रकम हिनामिना गरेको आरोप छ। आरोपपत्रमा नवराजपुर गाउँपालिका-२ मझौरामा प्रदेश सरकारको सांसद अनुदानबाट राम जानकी दलित आधारभूत विद्यालयको अधुरो कार्य पूरा गर्नका लागि दिएको रकममा कुनै कार्य नगरी सम्पूर्ण रकम हिनामिना गरेको उल्लेख छ। यस कार्यबाट १४ लाख ५१ हजार ५५१ रुपैयाँको हानिनोक्सानी भएको आरोप लगाइएको छ।