राजेन्द्र लिङ्देनले सर्लाहीका पूर्वराज्यमन्त्री “रामचन्द्र रायलाई” श्रद्धाञ्जलि अर्पण गर्दै पार्टी झण्डा ओढाए

राप्रपाले पूर्वराज्यमन्त्री राय हत्याको सत्यतथ्य जाँचबुझ गर्न माग पनि गरेको छ। सोमबार राप्रपाका प्रवक्ता मोहनकुमार श्रेष्ठले एक विज्ञप्ति जारी गर्दै हत्याजस्तो दुःखद् घटनाको सत्यतथ्य जाँचबुझ गर्न, घटनामा संलग्नको खोजी गर्न र कडा कारबाही गर्न सरकारको गम्भीर ध्यानकर्षण गराएका छन्। राप्रपाले संस्थापक सदस्य र तराई मधेश क्षेत्रको एकजना लोकप्रिय राष्ट्रवादी नेता गुमाएकोमा दुःख व्यक्त गरेको छ।

रायको आइतबार राति चन्द्रनगरमा रहेको आफ्नै फार्म हाउसमा धारिलो हतियार प्रयोग गरी हत्या भएको थियो। हत्यामा संलग्न रहेको आरोपमा प्रहरीले एकजना व्यक्तिलाई पक्राउसमेत गरेको छ। ८० वर्षीय राय राप्रपाबाट ३० वर्षअघि भूमिव्यवस्था राज्यमन्त्री भएका थिए। राजेन्द्र लिङ्देनले सर्लाहीका पूर्वराज्यमन्त्री रामचन्द्र रायलाई श्रद्धाञ्जलि अर्पण गर्दै पार्टी झण्डा ओढाएका हुन ।