आवाज बिहिनहरुको आवाज
गृहमन्त्री रमेश लेखकले सशस्त्र प्रहरी जवानलाई १६ वर्षमै पेन्सन दिने कानुनी व्यवस्था गर्न लागिएको बताएका छन्। सशस्त्र प्रहरी दिवसको अवसरमा हल्चोकस्थित मुख्यालयमा आयोजित कार्यक्रममा उनले यो घोषणा गरेका हुन्।
नेपाली कांग्रेसका नेता डा. शेखर कोइरालाले संविधान संशोधन दुई तिहाइ बहुमतकै आधारमा मात्र गर्न नहुने बताउँदै सबै दलबीच सहमति आवश्यक रहेको धारणा व्यक्त गरेका छन्।
नेपाल नागरिक उड्डयन प्राधिकरणका महानिर्देशक प्रदीप अधिकारीले फेब्रुअरी ३ बाट भैरहवा अन्तर्राष्ट्रिय विमानस्थलमा जजिरा एयरवेज र थाइ एशियाको उडान सुरु हुने बताएका छन्।
कृष्णनगर नगरपालिका-२ लिङ्गेटबाट स्रोत नखुलेको ६ लाख रुपैयाँसहित तीनजना पक्राउ परेका छन्। भारतबाट नेपालतर्फ आउँदै गरेका दुई व्यक्ति र थप अनुसन्धानबाट संलग्न तेस्रो व्यक्तिलाई प्रहरीले नियन्त्रणमा लिएको छ।
नेपालगञ्ज र बाँकेका क्षेत्रमा शीतलहरसहित चिसो बढेपछि स्थानीय तहले ज्येष्ठ नागरिकलाई लक्षित गरी चार सय ७५ कम्बल वितरण गरेका छन्। दाउरा बालेर आगो ताप्ने प्रबन्ध समेत मिलाइएको छ।
कोशी प्रदेश सरकारको पहलमा दुई अर्ब ४५ करोडको लगानीमा चार पर्यटकीय पदमार्ग निर्माण भइरहेको छ। मुन्धुम, लालीगुराँस, चिया, र महागुरू फाल्गुनन्द पदमार्गले पहाडी जिल्लाको पर्यटन प्रवद्र्धन र स्थानीय अर्थतन्त्रमा योगदान पुर्याउनेछ।
प्रधानमन्त्री केपी शर्मा ओलीले अन्तर्राष्ट्रिय हिमनदी वर्ष २०२५ को अवसरमा सगरमाथा संवाद कार्यक्रमको शुभारम्भ गरेका छन्। जलवायु परिवर्तन, हिमाल र मानव जीवनको भविष्यबारे पहिलोपटक विश्वव्यापी संवाद कार्यक्रम नेपालमा आयोजना हुँदैछ।
नेपालगञ्ज विमानस्थलमा बाक्लो हुस्सु र शीतलहरका कारण भिजिबिलिटी घट्दा आज बिहानदेखि सबै हवाई उडान ठप्प भएका छन्। जहाज उडाउन आवश्यक भिजिबिलिटी नपुग्दा काठमाडौं, धनगढी, पोखरा, र पहाडी जिल्लामा हुने उडानहरू प्रभावित भएका छन्। नागरिक उड्डयन कार्यालयका अनुसार यस क्षेत्रको जनजीवन पनि शीतलहरले प्रभावित बनेको छ।
पुर्णिमालाइ हटाएर गीतले अन्तर्राष्ट्रिय स्तरमा सफलता हात पार्दै, भारतको मुम्बईमा आयोजित Dadasaheb International Motivational Award-2025 मा दिपा कटुवाललाई Best Debut Female Model-Nepal अवार्ड दिलाएको छ। दिलिप लामाको स्वर, हेमराज काफ्लेको शब्द, र मनोज राज शिवाकोटिको संगीतले सजिएको यो म्युजिक भिडियोले प्रेम र बिछोडको कथालाई जीवन्त बनाएको छ।
तनहुँको व्यास नगरपालिका–१२ बेलभन्ज्याङमा मोटरसाइकल दुर्घटनामा दुई जनाको मृत्यु भएको छ। दमौलीबाट डुम्रेतर्फ जाँदै गरेको मोटरसाइकल अनियन्त्रित भई सडकबाट खस्दा उनीहरूको घटनास्थलमै मृत्यु भएको हो।
