राष्ट्रपति रामचन्द्र पौडेलसँग भारतीय विदेशसचिव विक्रम मिश्रीले शिष्टाचार भेट गरेका छन्। भेटमा नेपाल–भारत सम्बन्धबारे सकारात्मक संदेश आदानप्रदान भएको राष्ट्रपति कार्यालयले जनाएको छ।
राष्ट्रपति पौडेलले भारतले लिएको ‘नेइबर फर्स्ट’ नीतिको प्रशंसा गर्दै यसले दुई देशबीचको विशेष सम्बन्धलाई अझ प्रगाढ बनाउने विश्वास व्यक्त गरे। उनका अनुसार, नेपाल र भारतबीचको सम्बन्ध ऐतिहासिक र गहिरो भएकोले भविष्यमा अझ उच्च स्तरमा पुग्ने अपेक्षा गरिएको छ।
राष्ट्रपतिका परराष्ट्र मामिला सल्लाहकार डा. सुरेशचन्द्र चालिसेका अनुसार, यो भेट औपचारिक शिष्टाचारको दायरामै सीमित थियो। त्यसैले कुनै विशिष्ट मुद्दा वा विवादास्पद विषयमा प्रवेश गरिएको थिएन।
विदेशसचिव विक्रम मिश्रीले पनि नेपालप्रति भारतको निरन्तर समर्थन रहने बताए। उनले भारत नेपालमा विकास र सहकार्यका क्षेत्रमा निरन्तर संलग्न रहँदै आएको उल्लेख गर्दै भविष्यमा पनि यसलाई जारी राख्ने प्रतिबद्धता जनाए।
यस शिष्टाचार भेटलाई दुवै पक्षले दुई देशबीचको परम्परागत मित्रता, विकास सहकार्य र रणनीतिक साझेदारीलाई मजबुत बनाउने अवसरको रुपमा लिएका छन्।
