२१ साउन, सप्तरी — सप्तरी जिल्लाको राजगढ गाउँपालिका–२ स्थित नेपाल–भारत सीमाक्षेत्रमा अवैध मदिरा तस्करी नियन्त्रणका लागि मधेस प्रदेश प्रहरीले रातिको समयमा विशेष सर्च अपरेसन सञ्चालन गरेको थियो। अपरेसनको क्रममा प्रहरीले ८० कार्टुनभन्दा बढी विभिन्न ब्रान्डका रक्सी बरामद गरेको छ।
सोही क्रममा प्रहरीले नियन्त्रणमा लिन खोज्दा तस्कर समूहले प्रहरी टोलीलाई घेराबन्दी गर्दै ढुंगा मुढा प्रहार गरेका थिए। उक्त आक्रमणबाट आत्मरक्षाको उपायस्वरूप प्रहरीले ७ राउन्ड हवाई फायर र लक्षित गोली प्रहार गरेको मधेस प्रदेश प्रहरी प्रमुख उमाप्रसाद चतुर्वेदीले जानकारी दिए। गोली लागेर घाइते भएका राजगढ–२ निवासी ३० वर्षीय लालु यादवको उपचारका लागि लैजाँदै गर्दा बाटोमै मृत्यु भएको पुष्टि गरिएको छ।
सीमाक्षेत्रबाट भारततर्फबाट भारी मात्रामा अवैध मदिरा नेपाल भित्र्याएर तस्करी भइरहेको सूचना पाएपछि गरिएको अपरेसनमा प्रहरीमाथि हिंसात्मक आक्रमण भएको जनाइएको छ। यस घटनाले नेपाल–भारत सीमावर्ती क्षेत्रमा बढ्दो मदिरा तस्करी र त्यसमा स्थानीय संलग्नता तथा सुरक्षाको चुनौतीलाई उजागर गरिरहेको छ।
घटनापछि राजगढ क्षेत्र तनावग्रस्त बनेको छ भने स्थानीय प्रशासनले थप सुरक्षाकर्मी परिचालन गरेर अवस्था नियन्त्रणमा लिएको जनाएको छ। प्रहरी स्रोतका अनुसार यस सम्बन्धमा थप अनुसन्धान भइरहेको छ र फरार तस्करहरुको खोजी कार्य तीव्र पारिएको छ।
