भारतबाट मधेशका १६ बालबालिकाको उद्धार

उद्धार गरिएका बालबालिका मधेस प्रदेशका महोत्तरी, धनुषा, सिरहा, रौतहट र सप्तरी जिल्लाका हुन्। ती बालबालिकाको उमेर ९ देखि २२ वर्षबीचको रहेको जनाइएको छ। उनीहरू विभिन्न कारणले भारतको मुम्बई, दिल्ली र बिहार राज्यसम्म पुगेका थिए र त्यहाँ मानव तस्करी तथा श्रम शोषणको जोखिममा परेका थिए।

मधेस प्रदेशका खेलकुद तथा समाज कल्याण मन्त्रालयका निमित्त सचिव रञ्जित यादवको रोहवरमा बालबालिकालाई परिवारको जिम्मा लगाइएको हो। उद्धार प्रक्रिया ‘कीन इन्डिया’ र राष्ट्रिय बालअधिकार परिषद् मधेस प्रदेशको समन्वयमा सम्पन्न भएको हो। बालबालिकालाई सुरक्षित रूपमा घर फर्काउने कार्यमा स्थानीय प्रशासन र सामाजिक संस्थाहरूको समन्वय देखिएको छ।

यस्तै, दुई जना बालिकालाई पनि भारतीय प्रहरी र ‘कीन इन्डिया’को सहयोगमा उद्धार गरी जनकपुरधामस्थित बालकल्याण समिति तथा बालबालिका खोज उद्धार केन्द्रमार्फत अभिभावकको जिम्मा लगाइएको छ। यी बालिकाहरू पनि लामो समयदेखि भारतमा हराइरहेका थिए।

यस उद्धार अभियानले बालअधिकार संरक्षण र मानव तस्करीविरुद्ध सरकार र नागरिक समाजबीचको सहकार्यलाई बलियो बनाएको छ। मधेस प्रदेशका अधिकारीहरूले यसलाई बालसुरक्षाको दृष्टिले महत्वपूर्ण उपलब्धि भन्दै भविष्यमा पनि यस्ता बालबालिकाको खोज तथा उद्धार अभियान निरन्तर गर्ने प्रतिबद्धता जनाएका छन्।