काठमाडौं , चैत १७ : उत्पादनले उचित मूल्य नपाउँदा तरकारी किसानहरू गम्भीर चिन्तामा परेका छन्। केही समयअघि १० रुपियाँ किलोमा काउली बेच्न बाध्य भएका किसानहरूले अहिले गोलभेँडाको प्रतिकिलो पाँच रुपियाँमै बिक्री गर्नुपरेको छ। ग्राहकको अभावले गर्दा पनि समस्या झन् जटिल बन्दै गएको छ।
चुरेडाँडाबाट २५० किलो टमाटर लिएर बर्दीबासको शनिबारे हाटमा आएका किसान कर्णबहादुर तामाङ ढुवानी भाडासमेत असुल नहुने अवस्थामा पुगेका छन्। उनले टमाटर फ्याक्ने कि फिर्ता लैजाने भन्ने दोधारमा परेको बताएका छन्। त्यस्तै, मिथिला नगरपालिका–९ का अशोक महतोले ३० क्यारेट गोलभेँडा बिक्री नभएपछि ग्राहकले तोकेको मूल्यमै दिनुपर्ने बाध्यता आएको बताए।
हाल बर्दीबासमा तीन किसिमका गोलभेँडा विभिन्न मूल्यमा बिक्री भइरहेको छ:
- कविता गोलभेँडा – २५ केजीको क्यारेट ४०० रुपियाँ
- चिउरी गोलभेँडा – २५ केजीको क्यारेट ३०० रुपियाँ
- इन्डो अमेरिकन गोलभेँडा – २५ केजीको क्यारेट १५० रुपियाँ (प्रतिकिलो ५–६ रुपियाँ)
स्थानीय कृषकहरूका अनुसार बाहिरी व्यापारी आउन छाडेपछि निकासी प्रभावित हुँदै मूल्य झरेको हो। कृषि ज्ञान केन्द्रका बाली विकास अधिकृत मनिष पालका अनुसार मूल्य गिरावटको अर्को प्रमुख कारण भारतीय तरकारीको अतिक्रमण हो। प्लान्ट क्वारेन्टाइनको रिपोर्ट अनुसार चालु आवको साउनदेखि पुस महिनासम्म मात्रै ३ लाख ५८ हजार किलो भारतीय गोलभेँडा नेपाल भित्रिएको छ, जसको मूल्य ८६ लाख ४ हजार ५५२ रुपियाँ छ। साथै, २ करोड ४८ लाख ५४ हजार मूल्यको १० लाख ३५ हजार ६०० किलो भारतीय काउली पनि नेपाल भित्रिएको छ।
बर्दीबासका किसानहरू उत्पादनको उचित मूल्य नपाउँदा निराश भएका छन्। बर्दीबास–१२ का किसान रामउद्गार दास भन्छन्, “जबसम्म विदेशी तरकारी रोकिँदैन, तबसम्म नेपाली उत्पादनले उचित मूल्य पाउने सम्भावना छैन।”
