काठमाडौँ, फागुन ८ : सर्लाहीको हरिवन नगरपालिका-८ स्थित इन्दु शंकर चिनी उद्योगले उखु किसानहरूलाई समयमै भुक्तानी गर्दै आएको छ। चालु सिजनको क्रसिङ पुस पहिलो साताबाट सुरु गरेको उद्योगले माघ ३० गतेसम्म करिब २३ लाख ४३ हजार क्विन्टल उखु प्रशोधन गरिसकेको छ।
उद्योगका प्रशासकीय प्रवन्धक ठाकुर प्रसाद नेपालका अनुसार किसानहरूले बिक्री गरेको उखुको भुक्तानी उद्योगले एक हप्ताभित्रै उपलब्ध गराउँदै आएको छ। हालसम्म किसानहरूलाई कुल १ अर्ब २२ करोड ३५ लाख ४४ हजार रुपैयाँ भुक्तानी गरिएको छ। उखु प्रवन्धक योग नारायण रजकका अनुसार यस वर्ष उद्योगले अघिल्लो वर्षको तुलनामा ६ लाख क्विन्टल बढी उखु क्रसिङ गर्ने लक्ष्य राखेको छ।
साथै, उन्नत जातको उखु बीउ वितरण, माटो परीक्षण, आधुनिक कृषि उपकरण हस्तान्तरण, उत्पादन प्रविधिको प्रशिक्षण तथा स्थलगत अवलोकनमार्फत किसानहरूको क्षमता अभिवृद्धि गर्ने योजना अघि बढाइएको छ। सरकारले किसानहरूलाई ७० रुपैयाँ प्रति क्विन्टल अनुदान दिने निर्णय गरेको छ भने उद्योगले ५८५ रुपैयाँ थपेर कुल ६५५ रुपैयाँ प्रति क्विन्टल भुक्तानी गरिरहेको छ। देशभरका चिनी उद्योगहरूमध्ये समयमै भुक्तानी गर्ने उद्योगका रूपमा इन्दु शंकर चिनी उद्योगले करिब १२ हजार किसानहरूसँग उखु खरिद गर्दै आएको जनाएको छ।
