आवाज बिहिनहरुको आवाज
प्रधानमन्त्री केपी शर्मा ओलीले नेपाली युवाहरूको चौतर्फी विकासका लागि सरकार हरसम्भव सहयोग गर्न प्रतिबद्ध रहेको बताएका छन्। उनले सैनिक मञ्च टुँडिखेलमा आयोजित राष्ट्रिय सेवा दल (एनसीसी) को दीक्षान्त कवाज कार्यक्रममा युवाहरूलाई अनुशासित, देशभक्त र जिम्मेवार नागरिक बन्न प्रेरित गरे। कार्यक्रममा नेपाल सरकारका उच्च पदस्थ अधिकारीहरूको उपस्थिति रहेको थियो।
भूमि व्यवस्था, सहकारी तथा गरिबी निवारणमन्त्री बलराम अधिकारीले भूमिहीन दलित, सुकुम्बासी, तथा अव्यवस्थित बसोबासीलाई लालपुर्जा छिट्टै वितरण गर्ने तयारी सरकारको रहेको बताएका छन्। कानुनी बाधा हटाउन आवश्यक परे अध्यादेश ल्याइने र भूमि समस्या समाधान आयोगलाई अन्तिम आयोग बनाउने सरकारको योजना रहेको उनले उल्लेख गरे।
राष्ट्रपति रामचन्द्र पौडेलले राष्ट्र निर्माणको महाअभियानमा जुट्न सबैलाई अपिल गर्नुभएको छ। उहाँले युवा पलायन रोक्न, कृषि, पर्यटन, जलस्रोत, र पूर्वाधार विकासमा ध्यान दिनुपर्ने बताउनुभयो। पोखरालाई विश्वस्तरीय पर्यटन गन्तव्य बनाउन नीति निर्माताहरू, सरकारका तीन तह, र निजी क्षेत्रलाई समर्पित भएर लाग्न आग्रह गर्नुभयो।
राष्ट्रपति रामचन्द्र पौडेल पोखराको सराङकोटमा जारी श्रीमद्भागवत् ज्ञानमहायज्ञ एवम् धार्मिक पर्यटन महाउत्सव उद्घाटन गर्न आउँदै हुनुहुन्छ । उहाँले विभिन्न धार्मिक संरचनाहरूको उद्घाटन गर्नुका साथै महाउत्सवलाई सम्बोधन गर्नुहुनेछ ।
शुक्रबार बिहान २ बजेर ५२ मिनेटमा काठमाडौं उपत्यकामा ५.१ रेक्टर स्केलको भूकम्प गएको छ।
परराष्ट्रमन्त्री डा. आरजु राणा देउवाले नेपाललाई संयुक्त राष्ट्रसङ्घीय मानवअधिकार परिषद्को सदस्यका रूपमा मतदान गर्न विश्व समुदायलाई आग्रह गरेकी छन्।
स्वास्थ्य तथा जनसङ्ख्या मन्त्री प्रदीप पौडेलले समग्र स्वास्थ्य क्षेत्रलाई समेट्ने गरी एकीकृत स्वास्थ्य सेवा ऐन ल्याउने तयारी भइरहेको बताएका छन्। नयाँ ऐनले स्वास्थ्य सेवा प्रभावकारी बनाउन तथा स्वास्थ्यकर्मीहरूलाई दबाबरहित वातावरण उपलब्ध गराउन महत्वपूर्ण भूमिका खेल्नेछ।
स्वास्थ्य मन्त्रालयले विभिन्न मेला, महोत्सव तथा जात्राहरूमा सुर्तीजन्य पदार्थको विज्ञापन र प्रवर्द्धन नगर्न आग्रह गरेको छ। मन्त्रालयका अनुसार कानुन उल्लङ्घन गरेमा कडा कारबाही गरिनेछ।
खानेपानीमन्त्री प्रदीप यादवले नेपाल खानेपानी संस्थान कोमामा रहेको भन्दै यसलाई नाफामूलक बनाउन गम्भीर हुनुपर्ने बताएका छन्। संस्थानलाई सुधार्न नयाँ गेम चेन्जर कार्यक्रम ल्याउनुपर्ने उनको धारणा छ।
नेकपा (एमाले) का महासचिव शंकर पोखरेलले अवसरवाद र अराजकताले राजनीतिक आन्दोलनलाई अवरुद्ध पार्ने बताएका छन्। उनले स्वास्थ्य, शिक्षा, प्रविधि, र आर्थिक सुधारमा जोड दिनुपर्ने आवश्यकता औंल्याए।
