भक्तपुर। भक्तपुरको मध्यपुर थिमी नगरपालिका–२ स्थित शिक्षा विभाग नजिकै शुक्रबार बिहान भएको सडक दुर्घटनामा ५ वर्षीय आरव यादव नाम गरेको बालकको मृत्यु भएको छ। ट्रकको ठक्करबाट गम्भीर घाइते भएका बालकलाई तत्कालै उपचारका लागि कोरियन अस्पताल लगिएको थियो।
कोरियन अस्पतालमा उपचारका क्रममा गम्भीर घाइते बालकको ज्यान जोगाउन नसकिएको प्रहरी स्रोतले जानकारी दिएको छ। बालकको अवस्था अत्यन्त गम्भीर रहेको र चिकित्सकहरूले अथक प्रयास गरे पनि सफल हुन नसकेको जनाइएको छ।
मृतक आरव यादव सिराहा जिल्लाको विष्णुपुर गाउँपालिका–४ का स्थायी बासिन्दा हुन्। हाल उनका परिवार भक्तपुर सानोठिमीमा बसोबास गर्दै आएका थिए। उनी मन कुमार यादवका छोरा हुन्।
दुर्घटनामा संलग्न बा.२ क १२८४ नम्बरको ट्रकलाई प्रहरीले नियन्त्रणमा लिएको छ। चालकलाई समेत नियन्त्रणमा लिएर आवश्यक अनुसन्धान अघि बढाइएको महानगरीय ट्राफिक प्रहरी परिसर भक्तपुरले जनाएको छ।
यो दुःखद घटनाले सडक सुरक्षाप्रति गम्भीर प्रश्न उठाएको छ। बालबालिका र सर्वसाधारणको सुरक्षाका लागि सरकार तथा सम्बन्धित निकायले थप सतर्कता अपनाउनुपर्ने आवश्यकता देखिएको छ। स्थानीय बासिन्दा तथा सामाजिक अभियन्ताहरूले बाल सुरक्षाका उपायहरू कडाइका साथ कार्यान्वयन गर्न माग गरिरहेका छन्।
