काठमाडौँ । मनाङ, मुस्ताङ लगायतका हिमाली जिल्लामा गएको रातिदेखि भएको बाक्लो हिमपात का कारण यातायात पूर्णरूपमा अवरुद्ध भएको थियो। हिउँका कारण यात्रुहरू अलपत्र परेपछि सशस्त्र प्रहरी बलको टोलीले सडक खुलाउने कार्य सुरु गरेको हो। स्थानीय प्रशासन र सुरक्षाकर्मीले समन्वय गर्दै हिमपातको कारण प्रभावित क्षेत्रमा उद्धार र सहजीकरण कार्य अघि बढाएका छन्।
सशस्त्र प्रहरीका डीएसपी शैलेन्द्र थापाका अनुसार मुस्ताङको लोमाङथाङ गाउँपालिका–५ नेचुङ क्षेत्रमा अवरुद्ध सडकमा हिउँ पन्छाउने कार्य निरन्तर जारी छ। सशस्त्र प्रहरी बल नेपाल बोर्डर आउट पोष्ट नेचुङले कोरोला नाकासम्मको बाटो खुलाएको र यात्रुहरूको आवतजावत सहज बनाउन पहल भइरहेको उनले बताए।
कोरला नाकातर्फ जाने बाटोमा बाक्लो हिउँ जमेकाले सवारी आवागमनमा कठिनाइ उत्पन्न भएको थियो। थप हिमपातको सम्भावना रहेकाले प्रहरीले अनावश्यक भ्रमण नगर्न स्थानीय र पर्यटकलाई आग्रह गरेको छ। हिउँले सडक सतह चिप्लो बनेकाले यात्राका क्रममा सावधानी अपनाउन पनि सशस्त्र प्रहरीको अनुरोध छ।
त्यसैगरी, मनाङको डिस्याङ गाउँपालिका–४ हुम्डे क्षेत्रबाट खाङ्सारतर्फ जाने बाटो पनि सशस्त्र प्रहरी बल नेपाल नम्बर ३२ गुल्मका सुरक्षाकर्मीहरूले खुलाएका छन्। हिउँ पन्छाएपछि स्थानीय बासिन्दा र यात्रुहरूलाई आवश्यक आवागमन पुनः सहज बनेको छ। मौसम अझै अस्थिर रहेकोले यात्रुहरूलाई सचेत रहन सुझाव दिइएको छ।
यसैगरी, म्याग्दीको अन्नपूर्ण गाउँपालिका–४ अन्तर्गत पर्ने अन्नपूर्ण पदमार्गमा गएका पदयात्रीहरूको सहजीकरणका लागि सशस्त्र प्रहरी बल नेपाल विपद् व्यवस्थापन वेस नारच्याङ म्याग्दीको टोली पनि खटिएको छ। टोलीले हुमखोलाभन्दा माथिल्लो क्षेत्रमा पुगेका पदयात्रीहरूको सुरक्षा सुनिश्चित गर्दै आवश्यक सहयोग प्रदान गरिरहेको जनाएको छ। हिमपातको प्रभावले हिमाली पर्यटन क्षेत्रमा अस्थायी असर पारे पनि सुरक्षाकर्मीको सक्रियताले आवागमन बिस्तारै सामान्य बन्दै गएको छ।
