जनकपुर : नेपाली कांग्रेसका नेता विमलेन्द्र निधिले वर्तमान सत्ता समीकरण आगामी २०८४ सालसम्म कायम रहने बताएका छन्। जनकपुरधाम विमानस्थलमा सञ्चारकर्मीसँग कुरा गर्दै नेता निधिले वर्तमान सरकारलाई आ–आफ्नो तर्फबाट सहयोग गर्न नेता कार्यकर्तालाई आग्रह गरे। उनका अनुसार, राजनीतिक स्थिरता र विकासका लागि सबैले मिलेर काम गर्नु आवश्यक छ।
मधेश प्रदेश सरकारमा सहभागिताबारे उनले भने, ‘मन्त्रालय ठूलो कुरा होइन, मिलेर समस्या समाधान गरेर जानुपर्छ।’ उनले मन्त्रालयको संख्या र भागबन्डा भन्दा पनि समस्याको समाधान र जनताको सेवामा ध्यान दिनुपर्नेमा जोड दिए। नेता निधिले सबै दलहरूबीच सहकार्य र समन्वयको महत्त्वलाई पनि उजागर गरे।
विमानस्थलमा नेता निधिको साथमा जनता समाजवादी पार्टीका अध्यक्ष उपेन्द्र यादवसमेत थिए। यादवले पनि निधिको भनाइको समर्थन गर्दै वर्तमान सरकारलाई सफल बनाउन सबैले आ–आफ्नो भूमिका निभाउनुपर्ने बताए। यादवले मधेश प्रदेशका मुद्दाहरू समाधान गर्न र विकासलाई तीव्रता दिन सरकारको साथ दिनुपर्ने कुरामा जोड दिए।
