आवाज बिहिनहरुको आवाज
मलुकका सबै ६ महानगरपालिकाले सोमबार आगामी आर्थिक वर्ष २०८१/८२ को बजेट सार्वजनिक गरेका छन्। काठमाडौंले सबैभन्दा ठूलो बजेट २५ अर्ब ७० करोड ६३ लाख प्रस्तुत गरेको छ भने वीरगञ्जले सबैभन्दा सानो बजेट २ अर्ब ८९ करोड ल्याएको छ। बजेटमा सार्वजनिक सेवा, सहरी पूर्वाधार, र रोजगार सिर्जनामा जोड दिइएको छ।
म्याग्दीको बेनी नगरपालिका-३ भकिम्लीस्थित बेलढुङ्गा कृषि फार्मले उत्पादन गरेको उन्नत जातका आलुलाई ‘बेलढुङ्गा’ ब्राण्डिङ गरेर बजार पठाइने तयारी गरेको छ। फार्मका अध्यक्ष केयरसिङ पुनले बताएका अनुसार, यस फार्मले सय रोपनी जग्गामा फलाएको आलुलाई उन्नत जातको बेलढुङ्गा ब्राण्डमा बजार पठाउने योजना बनाएको हो।
बीरगंजमा निर्माणाधीन प्राकृतिक चिडियाखानाको ६० प्रतिशत काम सम्पन्न भएको छ। यो परियोजना स्थानीय र पर्यटकीय आकर्षणको केन्द्र बन्ने अपेक्षासहित अघि बढाइएको छ। चिडियाखानामा विभिन्न प्रजातिका जनावरहरूलाई प्राकृतिक वातावरणमा राख्ने योजना छ, जसले शिक्षाको साथै वन्यजन्तु संरक्षणमा समेत योगदान पुर्याउनेछ। यस परियोजनाले क्षेत्रीय विकासमा टेवा पुर्याउँदै रोजगारीका अवसरहरू सिर्जना गर्नेछ। बाँकी ४० प्रतिशत काम निर्धारित समयमै सम्पन्न गरिने लक्ष्य राखिएको छ।
सरकारले आगामी आर्थिक वर्षमा स्थानीय तहलाई ८८ अर्ब रुपैयाँ वित्तीय समानीकरण अनुदान प्रदान गर्ने घोषणा गरेको छ। अर्थमन्त्री वर्षामान पुनले बजेट सार्वजनिक गर्दै ससर्त अनुदानतर्फ दुई खर्ब आठ अर्ब ८८ करोड र समपूरक अनुदानका लागि सात अर्ब रुपैयाँको व्यवस्था गरिएको जानकारी दिए। बजेटमा विशेष अनुदानमार्फत आठ अर्ब ५० करोड रुपैयाँ पनि विनियोजन भएको छ।
