आवाज बिहिनहरुको आवाज
चितवनको फिस्लिङ नजिकै नेपालगञ्जबाट काठमाडौं जाँदै गरेको यात्रुबाहक बस त्रिशुली नदी किनारमा खसेको छ, जसमा कम्तिमा १२ जना घाइते भएका छन्। बिहान साढे ७ बजेतिर बस र विपरीत दिशामा रहेको कार ठोक्किदा भएको यो दुर्घटनामा कारमा सवार दुई जनाको अवस्था गम्भीर छ। उद्धार कार्य जारी रहेको र दुर्घटनास्थलमा ट्राफिक जाम भएको छ।
कपिलवस्तुको बुद्धभूमि नगरपालिका ४ झडुलामाईमा मंगलबार बिहान ५:३० बजे यात्रु बाहक बस र पिक अप ठोकिँदा एक जनाको मृत्यु भएको छ। काठमाडौंबाट सुर्खेत जाँदै गरेको बस र पिक अप एक आपसमा ठोकिँदा कपिलवस्तु शिवराज नगरपालिकाका पिक अप चालक हिरालाल बढईको घटनास्थलमै मृत्यु भएको हो। ठक्करपछि पिकअपमा च्यापिएका बढईको २ घण्टापछि उद्धार गरिएको थियो भने घाइतेलाई उपचारको लागि बुटवल पठाइएको प्रहरीले जनाएको छ।
भारतको जम्मु कश्मिरमा तीर्थयात्रु चढेको बसमा आतंकवादी आक्रमण हुँदा ९ जनाको मृत्यु भएको छ र ३३ जना घाइते भएका छन्। जम्मु कश्मिरको रायसी शिवखोरी गुमा मन्दिरतर्फ जाँदै गरेको बसमा आतंकवादीहरुले अन्धाधुन्द गोली प्रहार गर्दा बसका चालकले नियन्त्रण गुमाउँदा बस खाल्डोमा खसेको थियो। घाइतेहरुलाई नजिकैको नरैनापुर र रियासी जिल्ला अस्पतालमा उपचारका लागि लगिएको छ। भारतीय सुरक्षा बलले घटनास्थललाई पूर्ण रुपमा नियन्त्रणमा लिएको छ।
