आवाज बिहिनहरुको आवाज
कान्तिपुर मिडिया ग्रुपका अध्यक्ष कैलाश सिरोहिया चार दिनदेखि प्रहरी हिरासतमा रहँदा स्वास्थ्यमा समस्या देखिएपछि जनकपुरस्थित काव्या अस्पतालमा भर्ना गरिएका छन्। उच्च रक्तचाप, मुटुको चालमा उतारचढाव, र टाउको दुखाइका कारण उनलाई गम्भीर अवस्था भएपछि अस्पताल सारिएको हो। चिकित्सकहरू उनको स्वास्थ्य परीक्षण गर्दै नियमित रुपमा उपचार गरिरहेका छन्।
काठमाडौंमा कान्तिपुर मिडिया ग्रुपका अध्यक्ष कैलाश सिरोहियाले नागरिकता सम्बन्धी विवादमा प्रस्टीकरण जारी गरेका छन्। गिरफ्तारी पछि जारी गरिएको १० बुँदे बयानमा उनले जाहेरीवाला इन्द्रजीत प्रसाद महतोसँग कुनै चिनजान नभएको र नागरिकताको नम्बर टाइप गर्दा त्रुटि भएको बताएका छन्। सिरोहियाले एकभन्दा बढी नागरिकता नबनाएको र कानुन अनुसार दण्ड भोग्न तयार रहेको जनाएका छन्। उनले राज्यको हरेक अनुसन्धानमा सहयोग गर्न तयार रहेको र गिरफ्तारीलाई राज्यसत्ताको दुरुपयोग भनेका छन्। साथै, यो विवाद गृह मन्त्री रवि लामिछानेको दोहोरो नागरिकता र अन्य मुद्दासँग सम्बन्धित रहेको उल्लेख गरेका छन्।
कान्तिपुर मिडिया ग्रुपका अध्यक्ष कैलाश सिरोहियाको गिरफ्तारीलाई लिएर विभिन्न पत्रकार संघहरुले सरकारको प्रेस स्वतन्त्रता हनन र सत्ताको दुरुपयोगको आरोप लगाउँदै कडा विरोध जनाएका छन्।
