काठमाडौं । नेपाल, नेदरल्याण्ड्स, र थाइल्याण्ड सम्मिलित ऐतिहासिक महिला टी-२० आई क्रिकेट श्रृंखला बिहीबारदेखि काठमाडौंमा सुरु हुँदै छ। नेपालमा लगभग साढे दुई वर्षपछि अन्तर्राष्ट्रिय महिला क्रिकेट फर्किएको छ। नेपाल क्रिकेट संघ (क्यान) को आयोजनामा हुन लागेको यो श्रृंखला नेपालका लागि विशेष छ, किनभने यसअघि घरेलु मैदानमा अन्तिम पटक सन् २०२२ को मे महिनामा युगाण्डासँग मात्र श्रृंखला खेलेको थियो।
नेपाल, थाइल्याण्ड, र नेदरल्याण्ड्स पहिलो पटक एकैसाथ त्रिदेशीय टी-२०आई श्रृंखलामा प्रतिस्पर्धा गर्न लागेका हुन्। प्रत्येक टोलीले एकअर्कासँग तीन-तीन खेल खेल्नेछन्। खेलाडीलाई समान अवसर प्रदान गर्न सबै टोलीको समझदारीमा फाइनल खेल नराखिएको क्यानका प्रवक्ता पारस खड्काले जानकारी दिए।
नेपालको नेतृत्व अनुभवी कप्तान इन्दु बर्माले गर्नेछिन्, जसले पछिल्लो पीएम कपमा उत्कृष्ट प्रदर्शन गरेकी थिइन्। यस पटक नेपाली टिममा यू-१९ महिला विश्वकप खेलेका दुई युवा खेलाडी पनि समावेश छन्। कप्तान इन्दुले यो श्रृंखला नेपालका लागि महत्वपूर्ण भएको बताउँदै वरियता सुधार गर्न ठूलो अवसर भएको बताइन्।
नेपाल महिला टी-२०आई वरियतामा २०औं स्थानमा छ भने थाइल्याण्ड १३औं र नेदरल्याण्ड्स १६औं स्थानमा छन्। नेपालले उच्च वरियताका टोलीसँग खेल्दै रणनीति सुधार गर्न चाहन्छ। नेदरल्याण्ड्सकी कप्तान बाबेट डे लिडे र थाइल्याण्डकी कप्तान नारुमोल चाइवाइ नेपालमा पहिलो पटक खेल्न पाउँदा उत्साहित देखिन्छन्। थाइल्याण्डले यसअघि भारतको पुनेमा खेलेको अनुभवलाई नेपालमा उपयोग गर्न खोज्नेछ।
त्रिवि क्रिकेट मैदानमा हुने सबै खेलहरू निःशुल्क हेर्न सकिने व्यवस्था गरिएको छ। क्यानले महिला क्रिकेटको प्रवर्द्धन गर्न दर्शकलाई नि:शुल्क प्रवेश दिने निर्णय गरेको छ। क्यानका कोषाध्यक्ष पदम खड्काले दर्शकलाई मैदानमा आएर नेपाली महिला टोलीलाई समर्थन गर्न आग्रह गरेका छन्।
नेपालले माघ १७, १९, २०, २२, २३, र २५ गते गरी कुल छ खेल खेल्नेछ। सबै खेल सकिएपछि धेरै खेल जित्ने टोलीलाई श्रृंखलाको विजेता घोषित गरिनेछ। महिला क्रिकेटमा नेपालको प्रगति, युवापुस्ताको उदय, र घरेलु क्रिकेटको पुनरागमनको प्रतीक बनेको यो श्रृंखला नेपाली क्रिकेटको उज्ज्वल भविष्यको संकेत हो।
