गौर : रौतहटको गौर नगरपालिका-५ कोइरी टोलमा हत्या गरी फालिएको अवस्थामा एक वृद्धको शव फेला परेको छ। स्थानीय ७७ वर्षीय अनिरुद्ध महतोको शव बुधवार बिहान फेला परेको हो।
जिल्ला प्रहरी कार्यालय रोतहटकी प्रवक्ता प्रहरी नायब उपरीक्षक एलिजा गिरीका अनुसार शव फालिएको अवस्थामा धानखेतमा भेटिएको हो। पेटमा चक्कु प्रहार गरी हत्या गरिएको हुन सक्ने प्रवक्ता गिरीको भनाइ छ।
मृतकको घरदेखि शव भेटिएको स्थानसम्म प्रमाण संकलन गरी मिहिन ढंगले अनुसन्धान सुरु गरिएको प्रहरीको भनाइ छ।
‘घटनाको अनुसन्धान जारी छ। मृतक बस्ने स्थानदेखि घटनास्थलसम्म सर्च अभियान चलाइरहेका छौँ। प्रमाणहरू सङ्कलन गर्ने क्रममा छौँ,’ गिरीले भनिन्। गौर-५ का वडाध्यक्ष शिवशङ्कर यादवले धारिलो हतियार प्रहार गरी हत्या गरिएको देखिएको बताए।
स्थानीयहरूका अनुसार महतो बारीमा तरकारी खेती गर्दै आइरहेका थिए।
